SHKUP – Rruga “Cvetan Dimov”, një nga pikat më kritike të trafikut në Shkup, pritet të pësojë një transformim rrënjësor. Qyteti i Shkupit dhe Komuna e Çairit kanë bërë gati marrëveshjen për bashkëpunim ndërkomunal, e cila parashikon zgjerimin e këtij aksi rrugor me një kosto totale prej rreth 2.5 milionë euro (150 milionë denarë).
Plani Financiar: Investim deri në vitin 2028
Marrëveshja pritet të miratohet në seancën e radhës të Këshillit të Qytetit të Shkupit. Sipas dokumentacionit, financimi do të bëhet në faza, i mbuluar plotësisht nga buxheti i Qytetit të Shkupit:
-
Viti 2026: 5 milionë denarë (fillimi i punimeve dhe dokumentacioni).
-
Viti 2027: 55 milionë denarë.
-
Viti 2028: 90 milionë denarë.
Përveç anës financiare, Qyteti i Shkupit do të marrë përsipër edhe procesin e ndërlikuar të zgjidhjes së çështjeve pronësore-juridike, që shpesh kanë qenë pengesë për realizimin e projekteve në këtë zonë të dendur.
Çfarë përfshin projekti?
Segmenti që do t’i nënshtrohet rindërtimit shtrihet nga kryqëzimi me bulevardin “Nikola Karev” (afër Bit Pazarit) deri te kryqëzimi me rrugën “John Kennedy”.
Komuna e Çairit ka për detyrë përgatitjen e projektit të rishikuar urbanistik dhe projektit bazë të komunikacionit. Qëllimi kryesor është eliminimi i bllokimeve që krijohen aktualisht, ku për shkak të parkimeve të parregullta, rruga me katër korsi reduktohet në vetëm dy korsi funksionale.
Fund bllokimeve shumëvjeçare
Rruga “Cvetan Dimov” është arteria kryesore që lidh veriun e qytetit me qendrën, por prej vitesh mbetet një “ngushticë” ku qytetarët humbasin kohë të gjatë në kolona. Me këtë ndërhyrje, pritet që qarkullimi i automjeteve dhe autobusëve të Transportit Publik të jetë shumë më i rrjedhshëm.
