ANGLI – Futbollisti shqiptar, Anis Mehmeti, po kthehet në një nga emrat më të diskutuar në Championship-in anglez. Pas transferimit të tij te Ipsuiç nga Bristoli në fillim të janarit, Mehmeti ka treguar një formë të jashtëzakonshme, duke u përshtatur shkëlqyeshëm në rolin e ri si organizator i lojës.
Në fitoren e fundit 2-1 kundër Derbi Kauntit, shqiptari ishte njeriu kyç në fushë, duke krijuar vazhdimisht rrezik dhe duke udhëhequr manovrën sulmuese të skuadrës së tij.
Ambicie për majat e futbollit anglez
Në një intervistë për “Sky Sports” pas ndeshjes, Mehmeti nuk e fshehu vetëbesimin e tij dhe të skuadrës. Edhe pse Ipsuiçi aktualisht renditet në vendin e tretë, ai beson se janë ekipi më cilësor i kampionatit.
“Sipas meje, jemi ekipi më i fortë në këtë kampionat. Kam ardhur këtu me ambicien që të ngjitemi në Premier Ligë me këtë klub të madh. Po e shijoj çdo moment dhe dua të kontribuoj me fitore,” deklaroi Mehmeti.
Roli i ri dhe impakti i menjëhershëm
Mehmeti ka treguar pjekuri taktike duke shkëlqyer në rolin e organizatorit, një detyrë që i është besuar nga trajneri i Ipsuiçit. Kjo zhvendosje në qendër të lojës po i jep atij më shumë mundësi për të diktuar ritmin dhe për të shërbyer shokët e skuadrës, duke u bërë “truri” i mesfushës.
Fitorja në “Pride Park” kundër Derbit shihet si një pikë kthese për Ipsuiçin, i cili synon të kapë dy vendet e para që sigurojnë ngjitjen direkte në elitën e futbollit botëror, Premier Ligën.
