PEJË / DREJTËSI – Sot, më 27 shkurt 2026, mbushen plot gjashtë vjet nga vrasja e Qerim Kelmendit, një prej guerilëve të parë të UÇK-së dhe bashkëluftëtar i figurave qendrore të lirisë si Adem Jashari e Zahir Pajaziti. Megjithë kalimin e viteve, rasti mbetet një “dosje e pluhurosur” në sirtarët e drejtësisë kosovare, pa asnjë autor të vënë para përgjegjësisë.
Në një reagim të fortë në këtë përvjetor, familja Kelmendi ka adresuar kritika të ashpra ndaj Prokurorisë Speciale të Kosovës, duke denoncuar atë që ata e quajnë “mungesë të vazhdueshme të hetimit efektiv”.
Kalvari i prokurorëve pa asnjë rezultat
Familja ka listuar kronologjinë e dështimit institucional, duke vënë në dukje ndërrimin e tre prokurorëve pa asnjë progres:
-
Haki Geci: E mbajti lëndën për 3 vite pa veprime të dukshme derisa doli në pension.
-
Shpëtim Peci: Pas një viti u largua me dorëheqje nga Prokuroria Speciale.
-
Arbëresha Raça Shala: Prej dy vitesh ka rastin në kompetencë, por familja deklaron se nuk ka marrë asnjë informim zyrtar për masa konkrete.
Mbrojtja e reputacionit: “Asnjëherë i intervistuar”
Përmes kësaj komunikate, familja ka rikujtuar një fakt juridik që sipas tyre është tentuar të mjegullohet nga propaganda: Qerim Kelmendi, nga përfundimi i luftës e deri në ditën e vrasjes, nuk është thirrur apo intervistuar asnjëherë nga Policia apo Prokuroria për asnjë vepër penale. Familja vlerëson se fushatat e shpifjeve kundër tij kanë shërbyer si “ndihmë e drejtpërdrejtë në mjegullimin e hetimit penal”.
Dyshimet e familjes
Familja Kelmendi mbetet e palëkundur në qëndrimin se vrasja e 27-28 shkurtit të vitit 2020 është e lidhur drejtpërdrejt me:
-
Veprimtarinë e tij çlirimtare.
-
Një fushatë të organizuar shpifëse që, sipas tyre, mban elemente të shërbimeve armiqësore apo strukturave kriminale.
“Kjo situatë bie ndesh me detyrimin ligjor për një hetim të pavarur dhe brenda një afati të arsyeshëm,” thuhet në reagimin e familjes, duke kërkuar që drejtësia të mos mjaftohet me heshtjen, por të zbardhë të vërtetën mbi këtë vrasje që tronditi opinionin publik gjashtë vite më parë.
/ KOHANEWS
