Pas një pezullimi të shkurtër në fillim të vitit, Departamenti Amerikan i Shtetit ka publikuar rregulloren e re për Programin e Vizave të Diversitetit (Lotaria Amerikane). Rregullat e reja, të cilat hyjnë në fuqi më 10 prill 2026, synojnë të rrisin sigurinë dhe të luftojnë aplikimet e rreme.
Ndryshimi më i madh prek verifikimin e identitetit që në momentin e aplikimit. Tashmë, çdo person që dëshiron të provojë fatin për një jetë në SHBA, duhet të ketë pasaportën gati përpara se të nisë plotësimin e formularit.
Çfarë kërkohet sipas rregullave të reja?
Për të shmangur skualifikimin, aplikantët duhet të ngarkojnë në sistem:
-
Numrin e pasaportës së vlefshme.
-
Skanimin e faqes biografike (ku ndodhet fotoja dhe të dhënat).
-
Skanimin e nënshkrimit të tyre.
Gjithashtu, një risi është vendosja e një tarife simbolike prej 1 dollar në momentin e aplikimit, e cila duhet të paguhet nga të gjithë pa përjashtim. Ky hap është ndërmarrë për të parandaluar aplikimet e dyfishta apo ato që bëhen nga palë të treta pa dijeninë e individit.
Ndryshimet teknike për DV-2027:
-
Terminologjia: Termi “gjini” do të zëvendësohet me “seks” dhe “mosha” me “datën e lindjes” për saktësi më të lartë.
-
Verifikimi: Sistemi do të bëjë verifikimin e pasaportës si pjesë kyçe të procesit; nëse të dhënat nuk përputhen ose mungojnë, aplikimi skualifikohet automatikisht.
Përjashtime të rralla do të lejohen vetëm për personat pa shtetësi ose ata që e kanë të pamundur marrjen e pasaportës për shkaqe qeveritare. Këto rregulla do të aplikohen duke filluar me Lotarinë për vitin fiskal 2027.
