Në plazhet malazeze, përdorimi i shezlongëve dhe çadrave të diellit pas orës 17:00 do të jetë falas vetëm për shtetasit e Malit të Zi, ndërsa kjo lehtësim nuk vlen më për turistët e huaj, përcjell KohaNEWS duke iu referuar raportimeve të RTCG-së.
Sipas Marrëveshjes për Përdorimin e Mirëqenies Detare për sezonin 2026, qiramarrësit e plazheve janë të detyruar t’u mundësojnë përdorimin falas të inventarit të plazhit vetëm qytetarëve malazezë pas orës 17:00, pas paraqitjes së një dokumenti identifikimi. Ndryshe nga vitet e mëparshme kur kjo mundësi ishte e vlefshme për të gjithë vizitorët pa dallim, tani rregullat janë shtrënguar.
Megjithatë, situata në terren paraqitet e larmishme; në një plazh në Sutomore është vendosur njoftim se askush nuk mund t’i përdorë falas shezlongët pas orës 17:00 nëse nuk i ka paguar më parë. Nga ana tjetër, drejtori i ndërmarrjes publike “Morsko Dobro”, Mladen Mikijelj, ka paralajmëruar se çdo qiramarrës që tenton të arkëtojë pagesa për mobiliarin e plazhit pas orës 17:00 do të mbajë pasoja ligjore.
Autoritetet bëjnë me dije se qytetarët dhe vizitorët mund të denoncojnë çdo abuzim në Shërbimin e Kontrollit të Mirëqenies Detare ose në Inspekcionin Turistik, të cilët gjatë sezonit veror po kryejnë kontrolle të shtuara përgjatë bregdetit malazez.
/KohaNEWS
