Kryeministri i Kosovës, Albin Kurti, ka reaguar pas rezultateve të zgjedhjeve lokale në Maqedoninë e Veriut, ku koalicioni VLEN ka siguruar fitore në dhjetë komuna. Ai ka veçuar sukseset në Çair dhe Tetovë, ku – sipas tij – “dy miqtë”, Izeti dhe Bilalli, kanë triumfuar bindshëm falë projekteve konkrete dhe punës së ndershme.
Kurti e cilëson rezultatin si konfirmim të qeverisjes së mirë të VLEN-it dhe si shenjë të qartë të vullnetit për ndryshim te shqiptarët në vend. Ai thekson se gjatë 15 muajve në qeveri, VLEN ka qeverisur “me duar të pastra, pa korrupsion e skandale”, duke krijuar një dallim të fortë etik me pushtetet e mëparshme.
Sipas Kurtit, kjo frymë ndryshimi ka hapur rrugë për bashkëpunim më të thellë mes Kosovës dhe Maqedonisë së Veriut – nga mbledhja e përbashkët e qeverive deri te menaxhimi i përbashkët i kufirit. Ai shton se Qeveria e Kosovës i mirëpret zhvillimet demokratike në Shkup dhe i sheh si dëshmi të perspektivës evropiane të Maqedonisë së Veriut.
