Sot me datë 21.11.2025 Zëvendëskryeministri për Politika të Qeverisjes së Mirë Arben Fetai, mori pjesë në akademinë solemne të organizuar nga Instituti i Trashëgimisë Shpirtërore e Kultutore të Shqiptarëve-Shkup dhe Qeveria e Republikës së Maqedonisë së Veriut, me rastin e ditës së Alfabetit të Gjuhës Shqipe.
Gjatë fjalimit të tij, Zëvendës Kryeministri theksoi rëndësinë historike të Kongresit të Manastirit të vitit 1908 dhe rolin e tij vendimtar në unifikimin e alfabetit shqip, si një nga shtyllat kryesore të identitetit kombëtar shqiptar. Ai nënvizoi kontributin e rilindësve tanë dhe personalitetin e shquar të Mid’hat Frashërit, si dhe rëndësinë e Shtypshkronjës “Bashkimi i Kombit” në zhvillimin e botimeve shqipe.
Zëvendëskryeministri Fetai vlerësoi përkushtimin e koleksionistit dhe studiuesit Niko Kotherja dhe Institutit të Trashëgimisë Shpirtërore e Kulturore të Shqiptarëve në Shkup, të cilët hapën ekspozitën “Kongresi dhe Shtypshkronja” si homazh për trashëgiminë kulturore shqiptare.
Në përfundim, ai riafirmoi angazhimin e Qeverisë për mbrojtjen, kultivimin dhe promovimin e gjuhës, kulturës dhe identitetit shqiptar, duke e konsideruar këtë detyrë si përgjegjësi kombëtare dhe qytetare.
