Bashkimi Evropian po vendos masa të reja për paketat e vogla të importuara nga jashtë, kryesisht përmes platformave online, me vlerë deri në 150 euro. Aktualisht këto dërgesa përjashtohen nga taksat doganore, por një vendim i Ecofin synon të ndryshojë këtë situatë më herët se parashikohej, duke shkuar nga viti 2028 në 2026.
Tarifa e re, e cila pritet të jetë rreth 2 euro për paketë, do të vendoset në samitin e ardhshëm të ministrave të Financave më 12 dhjetor. Qëllimi është të mbrohen kompanitë evropiane nga konkurrenca e pandershme dhe të reduktohet ndikimi ambiental i transportit të dërgesave të shpeshta. Vitin e kaluar, 91% e paketave të vogla nga jashtë BE-së erdhën nga Kina, dhe shumë prej tyre ishin ndarë qëllimisht për të shmangur tarifat.
Autoritetet presin që taksa e re të sjellë rreth 9 miliardë euro në vit për BE-në. Për Italinë, kjo do të përkthehet në të ardhura shtesë rreth 1 miliard eurosh, të cilat mund të përdoren për objektiva specifikë dhe potencialisht për buxhetin e ardhshëm. Ministri italian i Ekonomisë, Giancarlo Giorgetti, dhe Komisioneri i BE-së për Tregtinë, Maros Sefcovic, e kanë përshëndetur vendimin si një mënyrë për të mbrojtur tregun e brendshëm dhe interesat e biznesit evropian.
