Qytetarët që skanojnë rregullisht faturat fiskale përmes aplikacionit “TVSH-ja Ime” do ta marrin kthimin e taksës për tremujorin e tretë të vitit deri në fund të nëntorit, njoftoi Ministria e Financave. Bëhet fjalë për mjetet e grumbulluara nga skanimet gjatë periudhës korrik–shtator, të cilat, sipas rregullave, paguhen 60 ditë pas përfundimit të tremujorit.
Sipas ministrisë, sistemi i kthimit funksionon normalisht, ndërsa vonesat ndodhin kryesisht kur qytetarët kanë të dhëna të pasakta ose të pa-azhurnuara për llogarinë transaksionale në Drejtorinë e të Ardhurave Publike. Ata që kanë ndryshuar bankën ose numrin e llogarisë duhet t’i përditësojnë të dhënat në profilin e tyre që pagesa të mos kthehet ose të bllokohet.
“TVSH-ja Ime” mbetet një nga aplikacionet më të përdorura shtetërore – përmes saj qytetarët marrin mbrapsht një pjesë të tatimit të paguar, ndërsa shteti zvogëlon ekonominë joformale duke inkurajuar marrjen e faturave fiskale në çdo blerje.
Me pagesën e paralajmëruar deri në fund të këtij muaji, përmbyllet cikli i kthimit për tremujorin e tretë dhe hapet cikli i ri, gjatë të cilit qytetarët duhet të sigurohen se të dhënat e tyre bankare janë të sakta dhe të përditësuara.
