Kryetari i LSDM-së, Venko Filipçe, tha se partia ka nisur një fazë të re denoncimesh lidhur me keqpërdorimet në pushtet, duke paralajmëruar publikimin e materialeve të reja që ai i quajti “bomba 2.0”. Në konferencën për media, ai bëri të ditur se brenda LSDM-së është formuar një grup i specializuar antikorrupsion, si dhe se do t’i kërkohet kryeprokurores europiane, Laura Kovesi, të vizitojë Maqedoninë e Veriut për të verifikuar dyshimet për abuzime me fondet IPARD dhe programet e tjera të BE-së.
Sipas Filipçes, rreth 130 milionë euro të fondeve europiane janë të rrezikuara, ndërsa ai akuzoi figura të afërta me kryeministrin dhe liderin e VMRO-DPMNE-së, Hristijan Mickoski, për përfshirje në skandale tenderësh dhe përfitime të kundërligjshme. Ai shtoi se LSDM ka dokumente të shumta që, sipas tij, dëshmojnë një rrjet keqpërdorimesh që duhet hetuar nga institucionet vendase dhe ato ndërkombëtare.
Nga ana tjetër, VMRO-DPMNE po kërkon hetim të thelluar për çështjen e 2.000 tonëve grurë të fshirë nga rezervat shtetërore, duke pretenduar se drejtues të LSDM-së kanë vepruar me skema korruptive gjatë krizës së furnizimeve. Ndërkohë, LSDM bën thirrje që Prokuroria të veprojë për tenderin prej 9 milionë eurosh të fituar nga një kompani me dy punonjës, për të cilën partia thotë se ka lidhje të afërta me VMRO-DPMNE-në.
