SHKUP, 21 dhjetor 2025 – Ministrja për Evropë dhe Punë të Jashtme e Shqipërisë, Elisa Spiropali, ka nisur vizitën e saj zyrtare në Maqedoninë e Veriut me një darkë pune me përfaqësues të lartë të qeverisë. Ajo u prit nga zëvendëskryeministri për qeverisje të mirë, Arben Fetai, i shoqëruar nga ministri për Çështje Evropiane, Orhan Murtezani dhe zv.ministri i Bujqësisë, Albrim Hoxha.
Axhenda e ngjeshur e takimeve Gjatë qëndrimit të saj, Spiropali pritet të zhvillojë një maratonë takimesh me krerët më të lartë të shtetit dhe faktorin politik shqiptar. Në agjendë janë paraparë takime me:
-
Presidenten Gordana Siljanovska-Davkova;
-
Kryeministrin Hristijan Mickoski;
-
Kryeparlamentarin Afrim Gashi;
-
Krerët e koalicionit VLEN: Izet Mexhiti, Bilall Kasami dhe Bekim Sali.
Mesazhet kryesore: Integrimi dhe Marrëveshja e Ohrit Fokus i bisedimeve do të jetë mbështetja e Shqipërisë për rrugëtimin evropian të Maqedonisë së Veriut. Ministrja Spiropali pritet të rikonfirmojë se zgjerimi i BE-së është jetik për stabilitetin e Evropës Juglindore.
Gjithashtu, një pikë me rëndësi të veçantë do të jetë vlerësimi i Marrëveshjes së Ohrit si shtyllë e harmonisë ndëretnike dhe roli i shqiptarëve si faktor stabiliteti në rajon.
Vizitat kulturore dhe akademike Përveç takimeve politike, Spiropali do të vizitojë Institutin e Trashëgimisë Shpirtërore e Kulturore të Shqiptarëve (ITSHKSH) dhe do ta përmbyllë vizitën e saj me një bashkëbisedim me studentë dhe profesorë në Universitetin e Tetovës.
