SHKUP – Kryetarja e Kuvendit të Shqipërisë, Elisa Spiropali, gjatë vizitës zyrtare në Shkup, është pritur në një takim nga Kryeministri i Maqedonisë së Veriut, Hristijan Mickoski. Në qendër të diskutimit ishin projektet konkrete ndërshtetërore dhe roli kyç i shqiptarëve në stabilitetin e rajonit.
Partneriteti dhe projektet konkrete
Spiropali dhe Mickoski vlerësuan frymën e hapur të dialogut, duke vënë theksin te nevoja për rezultate që prekin drejtpërdrejt jetën e qytetarëve. Partneriteti ndërinstitucional pritet të intensifikohet në fushat e infrastrukturës, ekonomisë dhe sigurisë.
Shqiptarët si faktor shtetformues
Një pikë kyçe e mesazhit të Spiropalit ishte pozita e shqiptarëve në Maqedoninë e Veriut. Ajo rikonfirmoi se roli i tyre kalon përtej një komuniteti të thjeshtë, duke u pozicionuar si motori kryesor i rrugëtimit drejt Bashkimit Evropian.
“Faktori shqiptar në RMV është jo vetëm një komunitet shtetformues i rëndësishëm dhe i domosdoshëm, por edhe një urë ndërlidhëse me Shqipërinë dhe një nxitës i rëndësishëm i proceseve eurointegruese,” u shpreh Spiropali.
