Kryeministri në detyrë, Albin Kurti, ka hedhur poshtë kritikat se ndarja e shtesave prej 100 eurove për fëmijët dhe pensionistët po bëhet për qëllime elektorale. Gjatë një vizite në stadiumin e Shtimes këtë të enjte, Kurti theksoi se ky veprim është një praktikë e rregullt e qeverisë së tij gjatë festave të fundvitit.
I pyetur rreth kohës së ekzekutimit të këtyre mjeteve – që përkon me ditët e fundit të fushatës – Kurti rikujtoi se kjo ka ndodhur edhe në vitet paraprake. “A kanë qenë ato shtesa edhe vitin e kaluar? Çdo herë para Vitit të Ri, kur kemi dimër e kemi festa, ne i gëzojmë të moshuarit dhe fëmijët. Nuk ka asgjë të re në këtë aspekt,” u shpreh ai.
Lideri i Vetëvendosjes shtoi se ajo që ai e konsideron “të re” është vetë modeli i qeverisjes, për të cilin u shpreh i bindur se do të vazhdojë edhe në një mandat të tretë.
Vendimi i djeshëm i Qeverisë parashikon që mjetet prej 100 eurove të ekzekutohen më 29 dhjetor. Kjo datë është veçanërisht delikate, pasi bie vetëm një ditë pas zgjedhjeve të jashtëzakonshme parlamentare të 28 dhjetorit. Ky sinkronizim kohor ka nxitur reagime të shumta nga opozita dhe shoqëria civile, të cilët e shohin si tentativë për ndikim te votuesit në prag të votimit.
Përkundër kritikave, procesi i shpërndarjes pritet të vazhdojë sipas planit, duke prekur qindra mijëra familje kosovare në prag të ndërrimit të moteve.
