WASHINGTON / PRISHTINË – Në një lëvizje të papritur që pritet të ketë ndikim të madh te mijëra aplikantë, Shtetet e Bashkuara të Amerikës kanë njoftuar pezullimin e procesimit të vizave imigruese (përfshirë Lotarinë Amerikane) për 75 shtete, ku bëjnë pjesë edhe Kosova e Shqipëria.
Kur hyn në fuqi dhe sa zgjat?
Sipas memorandumit zyrtar, masa nis zbatimin më 21 janar 2026. Ky pezullim nuk ka një afat të caktuar përfundimi dhe do të zgjasë derisa të përfundojë një rishikim i plotë i procedurave të verifikimit.
Arsyetimi: Rregulli “Public Charge” (Barra Sociale)
Vendimi bazohet në frikën se emigrantët e rinj mund të shndërrohen në “barrë” për sistemin e ndihmave sociale në SHBA. Faktorët që do të merren parasysh gjatë rishikimit janë:
Gjendja financiare dhe pasuria e aplikantit.
Njohja e gjuhës angleze.
Mosha dhe shëndeti (përfshirë nevojën për kujdes mjekësor afatgjatë).
Arsimimi dhe aftësitë për punë.
Pikat kyçe të vendimit:
75 shtete të prekura: Përveç Kosovës dhe Shqipërisë, në listë janë edhe vendet e rajonit si Bosnja, Mali i Zi dhe Maqedonia, si dhe vende nga Afrika, Azia dhe Amerika Latine.
Pezullim “pa afat”: Udhëzimi për oficerët konsullorë është që të refuzojnë aplikimet derisa procesi i ri i kontrollit të jetë gati.
Përjashtime shumë të rralla: Do të lejohen viza vetëm për raste tejet të veçanta që kalojnë filtra ekstremë të kontrollit “public charge”.
Sfondi politik: Ky vendim vjen pas zotimeve të Donald Trump në nëntor për të kufizuar emigracionin, pas një incidenti të rëndë ku një shtetas i huaj vrau një anëtare të Gardës Kombëtare pranë Shtëpisë së Bardhë.
Deklarata zyrtare
Zëdhënësi i DASh, Tommy Piggott, u shpreh i qartë: “Imigrimi nga këto vende do të pezullohet derisa të sigurohemi që personat që hyjnë nuk do të mbështeten në ndihma sociale.”
