Shqetësimi në rritje për shëndetin mendor dhe sigurinë e të miturve ka shtyrë qeveritë anembanë botës të ndërmarrin masa drastike kundër platformave si TikTok, Instagram dhe Facebook. Nga kufizimet me pëlqim prindëror deri te ndalimet e plota, ja si po ndryshon qasja globale ndaj teknologjisë:
Australia: Ndalimi më i rreptë në botë
Australia ka hapur rrugën duke u bërë vendi i parë që ndalon rrjetet sociale për fëmijët nën 16 vjeç. Ligji i ri, që hyn në fuqi në dhjetor 2025, detyron platformat të bllokojnë aksesin për këtë grupmoshë, duke parashikuar gjoba deri në 29.3 milionë euro për kompanitë që nuk e respektojnë atë.
Evropa: Drejt unifikimit të kufirit 15-16 vjeç
Vendet evropiane po garojnë se kush do të vendosë rregulla më të ashpra:
-
Franca dhe Sllovenia: Kanë miratuar ose po përgatisin ligje për të ndaluar rrjetet sociale për fëmijët nën 15 vjeç.
-
Spanja dhe Greqia: Po lëvizin drejt kufirit 15 ose 16 vjeç, ku platformat do të detyrohen të instalojnë sisteme të verifikimit të moshës.
-
Gjermania dhe Italia: Aktualisht kërkojnë pëlqim prindëror për moshat nën 14-16 vjeç, por kritikat për kontrolle të dobëta po shtyjnë drejt rregullave më strikte.
-
Britania e Madhe: Kryeministri Keir Starmer ka konfirmuar se po shqyrtohet ndalimi i stilit australian për të mbrojtur fëmijët online.
Azia dhe SHBA-ja: Kontrolle të ndryshme
-
Kina: Ka vendosur një “program për të miturit” që kufizon kohën që fëmijët kalojnë para ekranit në varësi të moshës dhe nivelit të aplikacionit.
-
Malajzia: Ka njoftuar se nga viti 2026 do të ndalojë përdorimin e rrjeteve sociale për të gjithë personat nën 16 vjeç.
-
SHBA: Ligji federal mbron privatësinë e fëmijëve nën 13 vjeç, por shtete të ndryshme po tentojnë të vendosin kërkesa për pëlqim prindëror deri në 18 vjeç, megjithëse përballen me sfida ligjore për lirinë e fjalës.
Pse po ndodh kjo tani?
Edhe pse shumica e platformave kanë një kufi teorik prej 13 vjeçësh, të dhënat tregojnë se miliona fëmijë shumë më të rinj kanë profile aktive. Ekspertët dhe zyrtarët qeveritarë argumentojnë se algoritmet janë “predatorë” dhe po dëmtojnë zhvillimin e fëmijëve, duke çuar në nevojën për rregullime që nuk varen më vetëm nga dëshira e kompanive teknologjike.
