SHKUP – Bordi Drejtues i Federatës së Futbollit të Maqedonisë (FFM), në mbledhjen e fundit të mbajtur sot, ka marrë një vendim drastik që prek drejtpërdrejt futbollin në qytetin e Kërçovës. Për shkak të shkeljeve të rënda të dispozitave të Statutit të FFM-së, Lidhja Komunale Futbollistike (LFK) e Kërçovës është suspenduar me dy vite heqje të të gjitha të drejtave.
Çfarë nënkupton ky suspendim?
Gjatë kësaj periudhe dyvjeçare, LKF e Kërçovës do t’i ketë të ngrira të gjitha të drejtat e anëtarësisë, duke përfshirë edhe ndalimin e pjesëmarrjes së delegatëve të këtij qyteti në Kuvendin e FFM-së. Megjithatë, Federata ka njoftuar se anëtarët e lidhjes së suspenduar nuk do të pësojnë pasoja sportive.
-
Klubet futbollistike: Të gjitha klubet anëtare të LKF Kërçovë do të vazhdojnë garat në rangun e tyre aktual për këtë sezon, ndërsa në sezonin 2026/27 do të luajnë në rangun ku do të arrijnë plasmanin.
-
Gjyqtarët dhe kontrollorët: Do të vazhdojnë aktivitetin e tyre në listat ku ndodhen aktualisht, pa u penguar nga ky suspendim.
-
Menaxhimi i ri: Deri në një vendim të radhës, të gjitha aktivitetet administrative për klubet dhe futbollistët e Kërçovës do t’i kryejë Komisioni për Regjistrim i LKF Gostivar.
Ndryshime në udhëheqësi dhe investime
Përveç suspendimit të Kërçovës, FFM mori edhe disa vendime të tjera të rëndësishme:
-
Ndryshime në Komisionin e Garave: Ish-reprezentuesi Svetozar Stankovski është emëruar kryetar i ri i këtij komisioni, duke zëvendësuar Vasko Dojçinovskin.
-
Investime në infrastrukturë: FFM do të blejë 15,000 deri në 20,000 ulëse të reja për stadiumet në mbarë vendin, të cilat do t’u shpërndahen klubeve të Ligës së Parë, të Dytë dhe të Tretë.
Ngjarjet e radhës
Federata gjithashtu njoftoi se Kuvendi i Rregullt Gjeneral do të mbahet më 21 mars 2026 në hotel “Hilton” në Shkup. Po ashtu, do të ketë hyrje falas për të gjitha ndeshjet kualifikuese të UEFA-s për femra (U17) që do të mbahen në Strumicë dhe Turnovë nga 28 shkurti deri më 6 mars./Kohanews
