PRISHTINË – Përfaqësuesja e Kosovës ka marrë lajmin më të keq të mundshëm në prag të ndeshjeve vendimtare të muajit mars për kualifikim në Kupën e Botës. Kapiteni dhe shtylla e mbrojtjes dardanë, Amir Rrahmani, do të jetë zyrtarisht jashtë fushave për shkak të një lëndimi serioz.
Detajet e lëndimit
Lëndimi ndodhi gjatë fundjavës në derbin italian mes Napolit dhe Romës. Pas analizave të hollësishme në spitalin “Pineta Grande”, klubi i Napolit ka konfirmuar se mbrojtësi kosovar ka pësuar një lezion të gradës së lartë në bicepsin femoris të kofshës së majtë.
Mungesë për disa muaj
Sipas raporteve mjekësore, ky lloj lëndimi kërkon një kohë të gjatë rikuperimi, që do të thotë se Rrahmani do të jetë jashtë fushave të blerta për disa muaj. Kjo mungesë e konfirmuar e lë Kosovën pa kapitenin e saj në përballjen kritike ndaj Sllovakisë, ku fitorja është jetike për ëndrrën botërore.
Përzgjedhësi i Kosovës tashmë duhet të gjejë me urgjencë një zëvendësues për qendrën e mbrojtjes, edhe pse pesha e Rrahmanit në fushë dhe në zhveshtore konsiderohet e vështirë për t’u plotësuar./Kohanews
