Kuvendi i Maqedonisë së Veriut ka hedhur hapin e parë drejt ndryshimeve të reja ligjore në sektorin e auto-automjeteve. Propozim-ligji për ndryshimin e Ligjit për automjete ka kaluar me sukses në lexim të parë, duke synuar ngushtimin e hapësirës për keqpërdorime nga ana e tregtarëve të pandërgjegjshëm dhe qendrave të kontrollit teknik.
Në Komisionin për Çështje Ekonomike u konstatua se ky projektligj duhet të kalojë në procedurë të mëtutjeshme parlamentare (lexim të dytë), përpara se të dërgohet për votim përfundimtar në seancë plenare. Ndryshimet morën mbështetje unanime nga anëtarët e komisionit me 6 vota “PËR”.
Çfarë sjellin konkretisht ndryshimet e reja?
Sipas iniciuesve të këtij propozimi, rregullat e reja do të fokusohen në tri shtylla kryesore:
-
Mbyllja e shtigjeve të manipulimit: Do të rritet kontrolli dhe mbikëqyrja institucionale ndaj subjekteve që merren me shitjen e makinave dhe stacioneve të kontrollit teknik.
-
Thjeshtësim i procedurave: Për qytetarët, procesi i regjistrimit pritet të bëhet më i thjeshtë dhe me shërbime më cilësore.
-
Rritje e përgjegjësisë: Rritet llogaridhënia e të gjithë akterëve të përfshirë në proces, ndërsa theksohet se këto ndryshime nuk do të sjellin harxhime apo implikime shtesë financiare për buxhetin e shtetit.
Fund mashtrimeve me kilometra?
Ky reagim ligjor vjen edhe si pasojë e ankesave të shumta të qytetarëve për manipulime në tregun e makinave të përdorura, ku kthimi prapa i kilometrave mbetet një nga problemet më të shpeshta.
Përmes këtij ligji synohet të fuqizohet bashkëpunimi ndërinstitucional (mes Policisë, Doganës dhe Inspektorateve) për të verifikuar gjendjen reale të automjeteve të vjetra përpara se ato të kalojnë nëpër kontrollet teknike. Autoritetet ndërkohë vazhdojnë t’u bëjnë thirrje blerësve që të denoncojnë çdo dyshim për mashtrim.
