Kryeministri në detyrë i Kosovës, Albin Kurti, ka komentuar aktakuzën e ngritur ndaj tre personave të dyshuar për shpërthimin në kanalin Ibër-Lepenc, duke e cilësuar këtë si rezultat të një hetimi të suksesshëm dhe bashkëpunimi të shkëlqyer mes institucioneve të sigurisë vendore dhe partnerëve ndërkombëtarë, përfshirë FBI-në.
Ai rikujtoi se që në orët e para pas sulmit kishte deklaruar se origjina ishte nga Serbia, bazuar në informacionet e inteligjencës, dhe tani hetimet kanë siguruar prova që tre të akuzuarit kanë qenë në vendngjarje dhe janë të lidhur me struktura ilegale serbe.
Kurti kritikoi Beogradin zyrtar për mohimin e përgjegjësisë dhe përpjekjet për dezinformim, duke theksuar se aktakuza konfirmon vlerësimet e institucioneve kosovare të bëra publike më herët. Ai shtoi se rasti dëshmon se terrorizmi në Kosovë nuk mbetet pa ndëshkim dhe se dezinformimi nuk mund të kalojë pa u zbuluar.
Kryeministri falënderoi institucionet e sigurisë, partnerët ndërkombëtarë dhe qytetarët për kontributin në ruajtjen e sigurisë dhe integritetit të Kosovës.
