TETOVË – Nën patronazhin e Reisul Ulemasë së BFI-së, H. Hfz. Shaqir ef. Fetai, dhe në bashkëpunim me Myftininë e Tetovës, u mbajt dje në Tetovë Akademia Shkencore kushtuar “Betejës së Bedrit”. Aktiviteti mblodhi krerë të lartë fetarë, akademikë dhe përfaqësues institucionalë në objektin e ri për shërbime fetare dhe sociale.
Akademia, e kryesuar nga Myftiu i Tetovës, Dr. Selver ef. Xhemaili, u fokusua në trajtimin e urtësive dhe porosive universale të kësaj ngjarjeje historike islame. Në panelin shkencor referuan figura të njohura si Prof. Dr. Shinazi ef. Memedi nga Fakulteti i Shkencave Islame dhe Mr. Nasir ef. Rexhepi, Myfti i Shtipit.
Pjesëmarrës në këtë ngjarje ishin edhe nënkryetari i Komunës së Tetovës, z. Albi Qamili, myftinjtë e Gostivarit dhe Ohrit, si dhe drejtorë e profesorë të institucioneve arsimore të BFI-së. Programi, i cili nisi me leximin e Kuranit nga h. Jonus ef. Tairi dhe u moderua nga Mr. Musanif ef. Rufati, përfshiu fjalime rasti që lartësuan rëndësinë e sakrificës dhe besimit.
Pas përfundimit të punimeve të akademisë, për të pranishmit u shtrua një iftar i përbashkët. Aktiviteti kulmoi me vizitat e komisionit të Rijasetit, të udhëhequr nga Mr. Hfz. Fejzulla ef. Sadiki, nëpër xhamitë e Tetovës gjatë namazit të teravisë, duke përmbyllur kështu një ditë të pasur me aktivitete shpirtërore dhe shkencore në muajin e bekuar të Ramazanit.
