Shkup, 16 janar 2026 – KF Shkëndija ka mësuar kundërshtarin e saj në raundin play-off të UEFA Ligës së Konferencës, duke shënuar një moment historik për futbollin e Maqedonisë së Veriut. “Kuqezinjtë” e Tetovës bëhen klubi i parë nga vendi që arrin të luajë në këtë fazë të avancuar të një gare prestigjioze evropiane.
Në shortin e hedhur sot në selinë e UEFA-s në Nion, fati ka përcaktuar që kampioni ynë të përballet me ekipin turk, Samsunspor. Sipas formatit të ri të garave, shorti ishte gjysmë i dirigjuar, ku Shkëndija kishte si alternativa të mundshme ekipin polak Lech Poznań ose turqit e Samsunspor-it.
Ky duel i dyfishtë do të përcaktojë udhëtarin për në 1/8 e finales. Sipas agjendës së zyrtarizuar:
-
Ndeshja e parë: Do të zhvillohet më 19 shkurt në stadiumin “Todor Proeski” në Shkup, ku Shkëndija do të jetë nikoqire.
-
Ndeshja e kthimit: Do të luhet një javë më vonë, më 26 shkurt, në Turqi.
Edhe pse Shkëndija hyn në këtë përballje si ekip jo-bartës, entuziazmi është në kulm pas ecurisë fantastike në fazën e grupeve. Përballja me Samsunspor-in shihet si një mundësi e artë për të vazhduar ëndrrën evropiane dhe për të dëshmuar rritjen e cilësisë së futbollit vendor në arenën ndërkombëtare.
