Olympique Lyon, një nga klubet më të njohura në futbollin francez, është përfshirë sërish në një skandal të madh financiar, pasi hetimet paraprake kanë zbuluar transfere të regjistruara për lojtarë që kurrë nuk kanë mbërritur në klub. Sipas informacioneve të para, bëhet fjalë për marrëveshje fiktive me vlerë të përgjithshme rreth 120 milionë euro, të lidhura me klubin brazilian Botafogo.
Hetimet tregojnë se mes mesit të vitit 2024 dhe fillimit të vitit 2025, janë regjistruar transaksione për transferimin e disa futbollistëve, mes tyre Igor Jesus, Luiz Henrique dhe Jefferson Savarino. Megjithëse dokumentet tregonin se shumat ishin paguar, asnjëri nga këta lojtarë nuk është paraqitur në Lyon, nuk është regjistruar si futbollist i klubit dhe nuk ka marrë pjesë në asnjë stërvitje apo ndeshje.
Problemi thellohet: hyrja e kompanive të faktoringut
Situata është bërë edhe më e ndërlikuar kur është zbuluar se kërkesat financiare të këtyre “transfereve” janë shitur më pas tek kompani të faktoringut. Këto kompani tani kanë nisur procedura ligjore për të kërkuar pagesat, duke e vendosur Lyonin nën presion të rëndë financiar dhe juridik.
Skandali lidhet me periudhën kur klubi drejtohej nga ish-pronari John Textor, emri i të cilit është përfshirë edhe më herët në çështje të dyshimta financiare brenda strukturave të tij multi-klub.
Reagimi i drejtuesve të rinj
Drejtuesit aktualë të Lyonit kanë njoftuar hapjen e një hetimi të brendshëm, paralajmëruar gjithashtu mundësinë e procedurave ligjore për të përcaktuar përgjegjësinë për kaosin financiar që ka dalë në dritë.
Nëse akuzat konfirmohen, Lyon mund të përballet jo vetëm me humbje të konsiderueshme financiare, por edhe me ndëshkime të rënda nga institucionet franceze të futbollit dhe organet mbikëqyrëse financiare.
Skandali ka shkaktuar jehonë të madhe në opinionin sportiv evropian dhe ka rindezur debatin mbi transparencën dhe integritetin në tregun e transfertave në futboll.
Mbetet të shihet se cilat do të jenë hapat e ardhshëm të klubit dhe nëse personat përgjegjës do të përballen me pasoja ligjore.
