Edhe pse u premtua se makineritë do të zbarkonin në terren brenda dhjetorit, punimet për autostradën Shkup-Bllacë janë prolonguar sërish. Zëvendësministrja e Transportit, Kaltrina Zekolli Shaqiri, e cila më herët deklaroi se vetëm moti mund të bëhej pengesë, tashmë konfirmon se shkaku i vonesës nuk është klima, por burokratizimi financiar.
Sipas kabinetit të saj, Ministria i ka përmbyllur të gjitha detyrimet institucionale, por procesi ka ngecur te miratimi final nga banka që financon projektin.
“Vonesa ka ardhur si pasojë e procedurave burokratike të institucionit financiar dhe periudhës së festave të fundvitit. Aktualisht presim vetëm dritën jeshile nga banka,” pohoi Zekolli.
Deri më tani, nga ky projekt janë ndërtuar vetëm 2 kilometrat e para, të cilat mbeten jashtë funksionit deri në përfundimin e 10 kilometrave të mbetura. Autostrada, me një kosto totale prej 240 milionë eurosh (rreth 24 milionë euro për kilometër), pritet të rinisë sapo të tejkalohen pengesat administrative me institucionin kredidhënës.
