Deputetja Marjana Koçeku, e cila së fundmi është larguar nga grupi parlamentar i Partisë Socialiste për të vazhduar angazhimin e saj si deputete e pavarur, ka reaguar ashpër ndaj familjes Bajraj nga Shkodra. Përmes një postimi në rrjetet sociale, Koçeku ka hedhur akuza të forta, duke lënë të kuptohet se ajo dhe familja e saj janë vënë në shënjestër të kërcënimeve.
Në mesazhin e saj, Koçeku ka paralajmëruar se nuk do të qëndrojë pasive ndaj asnjë tentative për të cenuar integritetin e familjarëve të saj. „Ky mesazh i drejtohet Bajrajve të Shkodrës. Nëse familjes sime i preket qoftë edhe një qime floku, unë nuk do të ndalem së shkatërruari ata, për aq sa të kem jetë“, ka shkruar ajo në profilin e saj në Instagram.
Ky reagim vjen në një periudhë delikate për ligjvënësen, e cila është përfshirë në debate të shumta politike pas vendimit të saj për t’u shkëputur nga radhët e mazhorancës. Ngjarja pritet të rrisë tensionet, ndërsa vëmendja e opinionit publik mbetet e përqendruar te zhvillimet e mëtejshme pas këtij kërcënimi të hapur.
