Rrjetet sociale vazhdimisht diktojnë trende të reja të ushqyerjes që premtojnë rezultate të shpejta, rritje të energjisë dhe “resetim” të organizmit.
Së fundmi, vëmendjen e përdoruesve të internetit e ka marrë i ashtuquajturi “sardine fast” (agjërimi me sardele), një sfidë ku për disa ditë rresht konsumohen ekskluzivisht vetëm sardele të konservuara. Kjo nënkupton: zero karbohidrate, zero sheqer dhe asnjë lloj ushqimi tjetër.
Për të testuar këtë regjim ekstrem, krijuesi i njohur i përmbajtjeve në YouTube, i quajtur Pigmie, vendosi ta provojë sfidën për 48 orë dhe të dokumentojë çdo ndryshim fizik e mental.
Çfarë është “agjërimi me sardele” dhe çfarë premton?
Ky trend bazohet në idenë e konsumimit të vetëm këtij peshku, i cili njihet si një burim i shkëlqyer i:
-
Proteinave me vlerë të lartë biologjike,
-
Vitaminave B dhe D,
-
Acideve yndyrore Omega-3.
Mbështetësit e këtij regjimi pretendojnë se ai ndihmon trupin të digjë dhjamin me shpejtësi, ul fryrjen e stomakut dhe eliminon toksinat. Megjithatë, ekspertët mjekësorë bëjnë thirrje për kujdes të shtuar, duke theksuar se dietat kaq restriktive mbartin rreziqe dhe nuk duhet të ndiqen pa konsultën e mjekut ose të një nutricionisti.
Eksperimenti 48-orësh: Lodhje, urrejtje për ushqimin dhe “gjendja zen”
Në fillim të eksperimentit, Pigmie vuri re se u duk menjëherë më i dobët dhe me më pak fryrje. Mirëpo, entuziazmi fillestar ra shpejt. Brenda pak orësh u shfaq një uri agresive – por jo për sardele, por për çdo lloj ushqimi tjetër. Përkushtimi i tij shkoi aq larg sa konsumoi edhe lëngun dhe vajin e mbetur në konservë.
Me kalimin e kohës, mungesa e karbohidrateve dhe sheqerit filloi të jepte efektet negative:
-
Lodhje e lartë dhe rraskapitje fizike,
-
Ndryshime të humorit e nervozizëm,
-
Ndjesia se koha po kalonte jashtëzakonisht ngadalë.
Nga ana tjetër, pas kalimit të fazës së parë të krizës për karbohidrate, ai deklaroi se përjetoi një ndryshim mental: “U ndjeva sikur arrita një lloj gjendjeje zen të fokusit” – u shpreh ai.
Përmirësim i shikimit dhe më pak dhimbje në nyje?
Përveç rënies në peshë (e cila fillimisht lidhet me humbjen e ujit dhe të kripës), YouTuberi pretendoi se vuri re edhe disa ndryshime të papritura pozitive. Sipas tij, dhimbjet kronike në nyje dhe në supet e dëmtuara filluan të fashiteshin, si dhe kishte përshtypjen se i ishte përmirësuar mprehtësia e shikimit.
Kjo lidhet me faktin se kur trupi mbetet pa karbohidrate, ai hyn në gjendjen e ketozës, duke përdorur yndyrnat si burim parësor energjie.
Paralajmërimi: Ekstremet sjellin rreziqe për shëndetin
Edhe pse sardelet janë jashtëzakonisht ushqyese dhe të shëndetshme kur përfshihen në një dietë të balancuar, kthimi i tyre në ushqimin e vetëm për ditë të tëra përbën rrezik.
Vetë Pigmie në fund të videos u bëri thirrje ndjekësve të tij të jenë të kujdesshëm, duke vënë në dukje se konsumi i tepërt i tyre në mënyrë kaq radikale mund të rrisë rreziqe të caktuara shëndetësore, përfshirë problemet që lidhen me mpiksjen ose hollimin e tepërt të gjakut.
Ky trend duhet të shihet thjesht si një sfidë që u bë virale për shkak të natyrës së saj të jashtëzakonshme, dhe jo si një udhëzues apo rekomandim dietik për t’u ndjekur.
