ATHINË – Drejtësia greke ka dhënë sot vendimin e parë mbi atë që konsiderohet si një nga skandalet më të rënda të survejimit në Bashkimin Evropian. Katër persona janë shpallur fajtorë dhe janë dënuar me burg për rolin e tyre në përdorimin e programit spiunazhi “Predator” për të përgjuar politikanë, gazetarë dhe zyrtarë të lartë, raporton Kohanews.
Skema e përgjimit: 87 objektiva nën shënjestër
Skandali, i njohur si “Watergate-i i Greqisë”, u zbulua në vitin 2022. Përmes programit izraelit Predator, u infiltruan pajisjet e 87 personave, përfshirë ministra të kabinetit qeveritar dhe kreun e partisë socialiste PASOK, Nikos Androulakis. Programi mundësonte akses të plotë në mesazhe, kamera dhe mikrofon pa dijeninë e përdoruesit.
Dënimet: 126 vite në letër, vetëm 8 në realitet
Gjykata e Athinës dënoi katër të pandehurit (dy grekë dhe dy izraelitë) me dënime të gjata burgimi për shkelje të konfidencialitetit të komunikimeve. Edhe pse ligjërisht dënimet e tyre arrijnë deri në 126 vite burg, për shkak të kufijve ligjorë për kundërvajtjet në Greqi, ata do të vuajnë maksimalisht vetëm 8 vite.
-
Të dënuarit: Felix Bitzios, Yiannis Lavranos, Tal Dilian dhe Sara Hamou.
-
Asnjë prej tyre nuk ishte i pranishëm në sallë gjatë shpalljes së vendimit.
Hija e Shërbimeve Sekrete (EYP) dhe “palëve të treta”
Vendimi i gjykatës hap një kapitull të ri hetimor. Gjykatësi theksoi se të dënuarit nuk kanë vepruar vetëm, por me pjesëmarrjen e “palëve të treta të panjohura”, ku dyshohet të jenë përfshirë zyrtarë të shërbimeve sekrete greke (EYP) dhe të huaja. Aktet e gjyqit i kanë kaluar Prokurorisë së Athinës për të hetuar veprën e rëndë të spiunazhit.
Akuzat për fshehje të së vërtetës
Ndonëse Kryeministri Kyriakos Mitsotakis e quajti ngjarjen një skandal, kritikët dhe opozita akuzojnë qeverinë për fshehje të fakteve, pasi deri më tani asnjë zyrtar qeveritar nuk është ulur në bankën e të akuzuarve. Një pjesë e të përgjuarve ishin njëkohësisht nën survejim ligjor nga EYP, çka ka ngritur pikëpyetje të mëdha mbi llogaridhënien demokratike.
Gazetari investigativ Thanasis Koukakis, një nga viktimat e këtij përgjimi, e cilësoi vendimin si një fitore të pjesshme për privatësinë, por beteja ligjore për të zbuluar urdhëruesit politikë mbetet ende e hapur.
/ KOHANEWS
