Gjykata e Posaçme (GJKKO) ka vendosur të shtyjë për datën 29 janar seancën gjyqësore ndaj ish-presidentit dhe kreut të Partisë së Lirisë, Ilir Meta. Gjatë seancës së mbajtur këtë të enjte (22 janar), prokurorët e SPAK kanë lexuar një pjesë të parashtrimeve që lidhen me akuzat e rënda ndaj ish-kreut të shtetit.
Akuzat dhe debatet në sallë Ilir Meta akuzohet nga Prokuroria e Posaçme për tre çështje kryesore:
-
Lobimi i ish-LSI në SHBA.
-
Fshehje e pasurisë.
-
Afera “CEZ-DIA”.
Sipas gazetares Klodiana Lala, seanca është shoqëruar me debate të ashpra mes palëve sa i përket vlefshmërisë së provave. Avokatët mbrojtës kanë pretenduar se SPAK nuk ka fakte konkrete që mbështesin akuzat e ngritura.
Mbrojtja: “Beteja mbetet e hapur” Pas përfundimit të seancës, avokati Kujtim Cakrani deklaroi për mediat se prokuroria nuk ka arritur të vërtetojë qëndrueshmërinë e akuzës.
“Kjo seancë e sotme vërtetoi se akuza nuk qëndron. Beteja mbetet e hapur dhe ne do të vazhdojmë mbrojtjen tonë,” u shpreh Cakrani.
Konteksti i arrestimit Ilir Meta ndodhet në masën e sigurisë “arrest me burg” që prej datës 21 tetor 2024. Ai i ka mohuar vazhdimisht të gjitha akuzat, duke e cilësuar procesin si politik dhe ka denoncuar mënyrën e arrestimit të tij si një “rrëmbim të dhunshëm” nga ana e Policisë së Shtetit.
