Presidenti Donald Trump deklaroi se Shtetet e Bashkuara po mendojnë për një “postepas zvogëlim” të operacioneve të tyre në Lindjen e Mesme, raportuan mediat amerikane duke cituar një postim të tij në Truth Social.
“Jemi shumë afër arritjes së objektivave tona, prandaj po shqyrtojmë një zvogëlim gradual të përpjekjeve tona të mëdha ushtarake në Lindjen e Mesme kundër regjimit terrorist në Iran,” shkroi Trump.
Ai përmendi konkretisht objektivat: dobësimin e kapaciteteve raketore të Iranit, shkatërrimin e bazave të industrisë së mbrojtjes, eliminimin e forcave detare dhe ajrore të Iranit dhe parandalimin e aftësisë bërthamore, si dhe mbrojtjen e aleatëve të SHBA në rajon. Trump përmendi Izraelin, Arabinë Saudite, Katarin, Emiratet e Bashkuara Arabe, Bahreinin, Kuvajtin dhe të tjerë.
Presidenti shtoi se ngushtica e Hormuzit, nëse është e nevojshme, duhet të ruhet nga vendet që e përdorin, duke theksuar se SHBA nuk e përdor. “Nëse kërkojnë ndihmë nga ne, do t’i ndihmojmë, por kjo nuk do të jetë e nevojshme pasi kërcënimi iranian të eliminohet,” tha ai.
Javën e kaluar, Trump paralajmëroi për Financial Times se NATO mund të ketë “një të ardhme shumë të keqe” nëse aleatët nuk ndihmojnë për kalimin e sigurt të anijeve tregtare në ngushticë. Megjithatë, aleatët evropianë shpejt e hodhën poshtë mundësinë e pjesëmarrjes në një operacion ushtarak për garantimin e furnizimit me energji.
Dje, para gazetarëve në Shtëpinë e Bardhë, Trump u pyet nëse mendon se Izraeli është i gatshëm ta përfundojë luftën pasi SHBA të përfundojë operacionet e saj. Ai u përgjigj: “Po, mendoj kështu.”
