Një shtetas shqiptar është dënuar nga gjykata belge me 1 vit burg dhe një gjobë prej 1,600 eurosh për një rast thyerjeje dhe hyrjeje të paligjshme në banesën e ministres belge të Arsimit, Drejtësisë dhe Punësimit, Zuhal Demir, në qytetin Genk.
Ngjarja daton më 7 janar 2023, kur i pandehuri kishte hyrë në shtëpi përmes një dritareje, pavarësisht se objekti ishte i rrethuar dhe i siguruar. Sipas mediave lokale, ai kishte kontrolluar disa dhoma para se të largohej, duke marrë vetëm 50 euro nga një kuti kursimi.
Autori u identifikua më vonë nga policia përmes gjurmëve të ADN-së, të cilat ishin gjetur pikërisht në kutinë ku ndodheshin paratë.
Gjykata vendosi dënimin me burg dhe gjobën financiare, duke e cilësuar shkeljen si të qëllimshme dhe me rrezikshmëri të lartë, për shkak të faktit se banesa i përkiste një zyrtare të lartë të qeverisë belge.
