Pavarësisht kritikave të shumta se një lëvizje e tillë do të linte pezull mijëra aplikues, qeveria amerikane ka vendosur të ndalojë përkohësisht procesimin e kërkesave për emigrim nga 19 shtete të botës. Sipas administratës, masat e reja synojnë forcimin e kontrolleve të sigurisë kombëtare pas shqetësimeve të ngritura javëve të fundit.
Administrata Trump ka sinjalizuar se këto kufizime mund të jenë vetëm fillimi. Zyrtarë të Departamentit të Sigurisë Kombëtare paralajmërojnë se lista mund të zgjerohet edhe me të paktën 30 shtete të tjera.
“Listën e plotë do ta publikojmë shumë shpejt”, deklaroi një zëdhënës i DHS, duke shtuar se masat lidhen drejtpërdrejt me identifikimin e “boshllëqeve të sigurisë” brenda sistemit të emigracionit amerikan.
Që prej ardhjes në detyrë të Donald Trump, ndalimet dhe kufizimet e udhëtimit janë shtuar dukshëm. Lëvizja e fundit erdhi pas sulmit ndaj anëtarëve të Gardës Kombëtare në Uashington javën e kaluar, ku një shtetas afgan u arrestua si i dyshuar.
Sipas politikës së re, të gjithë aplikantët nga vendet e prekura do të kalojnë një proces të thelluar verifikimi, ndërsa pezullimi mund të zgjasë pa afat të përcaktuar.
Administrata nuk ka sqaruar se sa kohë pritet të zgjasin kufizimet, ndërsa ka lënë të hapur mundësinë e shtimit të vendeve të tjera.
Shtetet më të prekura nga kufizimet aktuale përfshijnë:
-
Afganistanin
-
Burmanë
-
Çadin
-
Republikën e Kongos
-
Guinenë Ekuatoriale
-
Eritrenë
-
Haitin
-
Iranin
-
Libinë
-
Somalinë
-
Sudanin
-
Jemenin
Këto vende përballen me ndalime pothuajse të plota për shumicën e kategorive të hyrjes në SHBA, me përjashtime të kufizuara humanitare apo diplomatike.
