UEFA ka emëruar arbitrin islandez Ivar Ori Kristjanson për të gjykuar ndeshjen mes Shkëndijës dhe Slovan Bratislava në kuadër të javës së pestë të fazës së grupeve në Ligën e Konferencës.
36-vjeçari Kristjanson, i cili është arbitër me certifikatë FIFA dhe UEFA që nga viti 2018, debutoi në arenën evropiane të klubeve në takimin Fola Esch – Prishtina në kualifikueset e Ligës së Evropës. Ai do të ketë ndihmës arbitrat e tij bashkëkombës: Birkir Sigurdarson, Gulfi Mar Sigurdson dhe Vilhjalmur Torarinson.
Ndeshja Shkëndija – Slovan është caktuar të zhvillohet të enjten në orën 18:45 në “Arena Todor Proeski” në Shkup.
Para dy javëve të fundit të fazës së grupeve, Shkëndija pozicionohet në vendin e 25-të me 4 pikë, një më shumë se Slovan në vendin e 29-të. Direkt për në 1/8-at do të kalojnë tetë skuadrat e para, ndërsa ekipet nga vendi 9 deri në 24 do të luajnë në fazën e playoff-it për ndeshjet e nokautit në kompeticionin e tretë më të rangut evropian për klube.
