Opozita serbe: Vuçiq e kaloi vijën e kuqe, prokuroria duhet të reagojë

„Sot Aleksandar Vuçiq e kaloi vijën e kuqe duke paralajmëruar hakmarrje ndaj të gjithë njerëzve me mendim të lirë në Serbi. Diktatori kërcënon se së shpejti do të nisë një kundër-revolucion. Regjimi i Vuçiqit po përgatitet ta fusë Serbinë në një epokë represioni brutal, frikësimi dhe ndjekjeje politike. Ky është alarmi i fundit – jo vetëm për të gjithë qytetarët me mendje të lirë në Serbi, por edhe për komunitetin ndërkombëtar“, thuhet në deklaratën e Partisë së Lirisë dhe Drejtësisë (SSP).

Partia i bëri thirrje prokurorisë të reagojë menjëherë për shkak të „paralajmërimit të hakmarrjes ndaj popullit të vet“, duke theksuar se Vuçiq „duhet të mbajë përgjegjësi për çdo pasojë të kërcënimeve të tij“, raportojnë mediat serbe.

„Paralajmërimi për organizimin e një kundër-mitingu në Beograd konfirmon më tej se pushteti po përgatit me vetëdije krijimin e tensioneve të rrezikshme dhe përplasjeve mes qytetarëve. Kushdo që merr pjesë në këtë, kushdo që pranon të jetë pjesë e dhunës dhe kërcënimeve, do të mbajë përgjegjësi për atë që do të vijë. SSP u bën thirrje të gjithë njerëzve të lirë të bashkohemi dhe të kundërshtojmë këtë çmenduri. Serbia nuk është dhe nuk do të jetë një shtet privat dhe diktatorial“, vazhdon deklarata.

Vuçiq sot njoftoi se së shpejti „do ta thërrasë gjithë Serbinë në Beograd“ për të treguar, siç tha ai, se Serbia „nuk është një grusht i vogël që mund të konsumohet lehtësisht“.

„Së shpejti do t’ju thërrasim të gjithëve në Beograd. Do t’i thërrasim të gjithë, gjithë Serbinë, për të treguar se Serbia nuk është një grusht i vogël që ata mund ta hanë lehtësisht“, tha Vuçiq, duke e përfunduar fjalimin e tij me fjalët „Shihemi së shpejti“.

Studentët, të cilët që nga fundi i nëntorit të vitit të kaluar kanë bllokuar fakultetet e tyre, pas protestave në Novi Sad, Kragujevc dhe Nish, kanë njoftuar një protestë të re për 15 mars, gjithashtu në Beograd.