Autoritetet saudite kanë vendosur një ndalim të plotë për fotografimin dhe filmimin brenda Xhamisë së Madhe në Mekë dhe Xhamisë së Profetit në Medinë për sezonin e haxhit 2026. Masa përfshin ndalimin e përdorimit të telefonave celularë, kamerave dhe çdo pajisjeje tjetër të regjistrimit audiovizual.
Sipas mediave ndërkombëtare, vendimi synon të mbrojë privatësinë e miliona pelegrinëve, të ruajë qetësinë shpirtërore të dy vendeve të shenjta dhe të lehtësojë lëvizjen në zonat ku qarkullimi i njerëzve arrin nivele shumë të larta.
Autoritetet fetare dhe të sigurisë kanë theksuar se përdorimi i pajisjeve për fotografi dhe video në këto ambiente ka shkaktuar shqetësime të vazhdueshme, duke ndikuar në devotshmërinë e pelegrinëve dhe në organizimin e ritualeve. Po ashtu, filmimet e pakontrolluara janë konsideruar si një pengesë për administrimin e turmave gjatë orëve të pikut.
Vendimi që zgjerohet mbi kufizimet e kahershme, do të zbatohet rreptësisht për të gjithë vizitorët, ndërsa shkeljet mund të sjellin konfiskimin e pajisjeve dhe masa të tjera ligjore.
Autoritetet saudite kanë paralajmëruar gjithashtu se do të dislokohen ekipe të posaçme mbikëqyrëse për të asistuar pelegrinët dhe për të garantuar respektimin e rregullave, me qëllim krijimin e një mjedisi më të sigurt, më të rregullt dhe më të përqendruar në adhurim.
