Superkompjuteri i Opta-s ka kryer mijëra simulime për Botërorin 2026 që do të zhvillohet në SHBA, Kanada dhe Meksikë, dhe sipas rezultateve, Spanja del si favorite kryesore për të ngritur trofeun e madh. Kombëtarja e Luis de la Fuente ka një probabilitet prej 17% për ta fituar titullin, duke u konsideruar skuadra më e kompletuar për turneun. Performanca e qëndrueshme, gjenerata e re dhe taktikat e mençura e vendosin “La Roja” në krye të statistikave.
Pas Spanjës renditet Franca me 14.1% shanse për fitore. Finalistja e dy Botërorëve të fundit synon të bëhet kombëtarja e parë që pas Gjermanisë dhe Brazilit arrin të luajë tri finale radhazi, duke u mbështetur në cilësinë dhe përvojën e lojtarëve të saj.
Në vendin e tretë renditet Anglia me 11.8% probabilitet. Megjithatë, statistikat tregojnë se aspekti emocional mund të jetë sfidë për “Tre Luanët”, të cilët nuk kanë arritur finale Botërori që nga viti 1966.
Argjentina, kampione e Botërorit 2022, ka 8.7% gjasa për të përsëritur triumfin. Edhe pse ende udhëhiqet nga trashëgimia e brezit të Messit, algoritmet sugjerojnë vështirësi në rinovimin e suksesit. Megjithatë, ajo mbetet kombëtarja jo-europiane me shanset më të larta për titull.
Një surprizë e veçantë është Portugalia, e cila ka 6.6% probabilitet për të fituar Botërorin për herë të parë. “Iberikët” paraqiten si pretendentët më seriozë mes ekipeve që nuk e kanë fituar kurrë këtë turne prestigjioz.
