Administrata e presidentit Donald Trump ka shpallur tre projekte me vlerë 36 miliardë dollarë, të cilat do të financohen nga Japonia. Investimet përfshijnë një “qendër eksporti të naftës” në Teksas, një fabrikë industriale për diamante në Georgia dhe një termocentral me gaz natyror në Ohio.
Këto projekte janë të parat sipas zotimit të Japonisë për të investuar 550 miliardë dollarë në SHBA dhe si pjesë e marrëveshjes tregtare me të cilën u ulën tarifat e Trump për importet japoneze me 15 për qind, njoftoi Trump në “Truth Social”. Ai dha pak detaje për projektet.
Ministri i Tregtisë, Howard Lutnick, deklaroi se termocentrali në Portsmouth, Ohio, me vlerë 33 miliardë dollarë, do të jetë më i madhi në histori i ndërtuar me gaz natyror, me kapacitet prej 9,2 gigavatësh. Objekti, i cili do të menaxhohet nga SB Energy, një degë e grupit japonez SoftBank, pritet të rrisë kapacitetin bazë të energjisë në një kohë kur kërkesa për energji elektrike po rritet me shpejtësi nga qendrat e të dhënave të ndërtuara për aplikacionet e inteligjencës artificiale.
